Kalaallisut qarasaasiakkut atuffassissut Martha piareerpoq

Nivi Olsen, Naalakkersuisoq for Uddannelse, Kultur, Forskning og Kirke

Syncenter Refsnæsip kalaallisut qarasaasiakkut atuffassissut Martha kulturikkut illorsuarmi Katuami ullumi saqqummiutissavaa. Martha ikiorsiullugu kalaallit isigiarsuttut, naqinnernik ilisarsisinnaanngitsut atuarniarnikkullu ajornartorsiuteqartut kalaallisut allakkanik atuffanneqarsinnaalissapput. Atuffassissut ilinniartitaanermi immikkut perorsaanermik suliaqarnermut annertuumik sunniuteqassasorineqarpoq soorluttaaq isigiarsuttunut kiisalu naqinnernik ilisarinnissinnaanngitsunut innuttaasunullu atuarniarnikkut ajornartorsiutilinnut aamma pingaaruteqassalluni.  Martha ukiuni pingasuni ineriartortitsilluni suliniummut ilaavoq, suliniummullu aamma ilaapput perorsaasunik ilinniartitsisunillu immikkut pisariaqartitsisunik sulialinnut pikkorissaaneq kiisalu Danmarkimi atortorissaarutinik akulerutsitsinermut atorneqartunik tulluarsaanerulluni. Suliniut 2013-imiit 2015-imut ingerlanneqartoq VELUX-ip aningaasaateqarfiinit aningaasalersorneqarpoq inuuiannullu kalaallinut tunissutaalluni.

Kalaallisut atuffassissummik amigaateqarnerup kingunerisimavaa Kalaallit Nunaanni tappiitsut atuarniarnermillu ajornartorsiuteqartut qarasaasianik atuisinnaanerisa killeqarsimaneri. Marthap atulerneratigut allakkat nipinngortinneqarsinnaalissapput atortorissaarutillu arlallit kalaallisut atorneqarsinnaalissallutik. Assersuutitut programmit nalinginnaasut soorlu Microsoft Word aamma Apple Safari atorlugit kalaallisut atuffatsittoqarsinnaalissaaq atortorissaarutillu immikkut ittut soorlu skærmimut atuffatit, programmit allisitsiutit kiisalu naqinnernik ilisarsisinnaanngitsunut atortorissaarutit atorneqarsinnaalissallutik.

Martha nittartakkami www.atuffat.gl-mi akeqanngitsumik aaneqarsinnaavoq. Tassani Kalaallit Nunaanni innuttaasut aamma danskisut atuffassissummik akeqanngitsumik aallersinnaapput. Kalaallisut atuffassissut ukiuni arlariinni ineriartortitaavoq. Danskit suliffeqarfiutaata MV-Nordic A/S-ip Martha oqaasilerinermik ilisimasallit Kalaallillu nunaanni oqaatsinik suliaqartut peqatigalugit Syncenter Refsnesimut suliarisimavaat. Decembarimi 2014-imi Martha Kalaallit Nunaanni nalilersorneqarmat paasineqarpoq atuffat piviusorpalullunilu paasiuminartuusoq. Suliniutip naammassinerata kingorna atuffammik aserfallatsaaliuineq Oqaasileriffiup ingerlatilissavaa.

Atuffatip Marthap inerisarnerata saniatigut Synscenter Refsnæsip aamma ilaatigut qarasaasiakkut allanngortitsissut nersornaaserneqarsimasoq Robobraillemik taaneqartoq kalaallisuunngortissimavaa. RoboBraille atorlugu atuartitsissutit assersuutigalugu tappiitsut allattaasaannut, atuakkanut nipitalinnut qarasaasiakkullu naqitanut nipinngortitanut allanngortinneqarsinnaapput. Sullissivik taanna atorlugu aamma naqitat piuminaatsut isigiarsuttunut atuarniarnermillu ajornartorsiutilinnut paasiuminarnerulertinneqarsinnaapput.  RoboBraille akeqanngilaq uanilu misilinneqarsinnaalluni: www.robobraille.org.

Synscenter Refsnæs tassaavo q Danmarkimi tappiitsut isigiarsuttullu pillugit ilisimasaqarfik. Synscenter Refsnæsip Namminersorlutik Oqartussat ukiorpassuarni isigiarsuttut pillugit ilisimasanik ikorfartortarsimavai.